O‘zbekiston va Avstriya chorvachilik hamda naslchilik sohasida hamkorlikni kengaytiradi

O‘zbekiston Oziq-ovqat xavfsizligi qo‘mitasi va Avstriya qishloq xo‘jaligi klasteri vakillari chorvachilik va veterinariya sohasidagi aloqalarni mustahkamlash masalalarini muhokama qildilar. Tomonlar nasldor qoramol savdosini oshirish va chorva mahsulotlari eksportini yo‘lga qo‘yish imkoniyatlarini ko‘rib chiqdi.

Muzokaralarda Avstriyaning naslchilik va genetika borasidagi ilg‘or tajribasini joriy etishga alohida e’tibor qaratildi. Xususan, nasldor qoramollarning embrionlarini olish va ularni ko‘chirib o‘tkazish bo‘yicha qo‘shma loyihalarni amalga oshirish rejalashtirilmoqda. Shuningdek, o‘zbekistonlik mutaxassislarni Avstriyada malakasini oshirish va mamlakatimizda amaliy treninglar o‘tkazishga kelishib olindi.

Rasmiy ma’lumotlarga ko‘ra, 2026-yilning oktyabr holatiga ko‘ra O‘zbekistonga Avstriyadan 1500 bosh Simmental zotdor qoramollari, 714 tonna veterinariya preparatlari hamda 4,7 tonna sut mahsulotlari keltirilgan. O‘z navbatida, O‘zbekistondan Avstriyaga 34,5 tonna chorvachilik mahsulotlari eksport qilindi.

Dehqon uchun

Ushbu hamkorlik mahalliy fermerlarga Avstriyaning yuqori mahsuldor Simmental zotdor qoramollari genetikasi va zamonaviy embrion transplantatsiyasi texnologiyalaridan foydalanib, sut hamda go‘sht yo‘nalishidagi chorva unumdorligini oshirish imkonini beradi.

Manba: AgroWorld Uzbekistan

Rasmlar sun’iy intellekt yordamida yaratilgan bo‘lishi mumkin.