Ўзбекистонда рекорд даражада 5 миллион тонна пахта ҳосили йиғиб олинди

Жорий мавсумда мамлакатмизда илк бор 5 миллион тоннадан зиёд пахта ҳосили йиғилди. Ўртача ҳосилдорлик кўрсаткичи ҳар гектардан 21 центнердан 56 центнергача кўтарилди. Баъзи майдонларда, жумладан 400 минг гектарга яқин ерда ҳосилдорлик 70 центнерни, Жарқўрғон ва Пахтакор туманларидаги рекордчи фермерларда эса 110 центнерни ташкил этди.

Муваффақиятга эришишда қуйидаги омиллар муҳим роль ўйнади:

• Сув тежовчи технологиялар ва мақбул экиш схемалари қўлланилиши;
• Зараркунандаларга чидамли янги биотехнологик навларнинг жорий этилиши;
• Рақамлаштириш ва агродронлардан фойдаланиш орқали харажатларнинг икки бараварга камайиши;
• Терим жараёнининг 85 фоизи 3 мингга яқин машиналар ёрдамида бажарилгани.

Жиззах, Хоразм, Бухоро, Навоий ва Сирдарё вилоятларида ўртача ҳосилдорлик 60 центнердан ошди. Жорий йилда фермерларнинг соф фойдаси 13−14 триллион сўм атрофида бўлиши кутилмоқда. Келгуси йилда ўртача ҳосилдорликни 65−70 центнерга етказиш режалаштирилган.

Dehqon учун

Ҳосилдорликни 70 центнердан ошириш учун янги биотехнологик навларни сув тежовчи технологиялар, агродронлар ва тўғри экиш схемаси билан биргаликда қўллаш зарур.

Manba: Gazeta.uz (o‘zbekcha)